ដោយទទួលបានការអនុញ្ញាតពី ឯកឧត្តម ប្រាជ្ញ ចន្ទ ប្រធាន គ.ជ.ប នាព្រឹកថ្ងៃពុធ ទី៣ ខែមេសា ឆ្នាំ២០២៤ វេលាម៉ោង ១០:០០ នៅទីស្តីការគណៈកម្មាធិការជាតិរៀបចំការបោះឆ្នោត (គ.ជ.ប) ឯកឧត្តម ហង្ស ពុទ្ធា សមាជិក គ.ជ.ប និងជាប្រធានក្រុមអ្នកនាំពាក្យ គ.ជ.ប បានទទួលជួបនិសិ្សតចំនួន ១១រូប ដែលដឹកនាំដោយលោកសាស្ត្រាចារ្យ ជា ធីរិទ្ធ មកពីវិទ្យាស្ថានសិក្សា អន្តរជាតិ និងគោលនយោបាយសាធារណៈនៃសាកលវិទ្យាល័យភូមិន្ទភ្នំពេញ។
ជាដំបូងលោកសាស្ត្រាចារ្យ ជា ធីរិទ្ធ បានថ្លែងអំណរគុណដល់ឯកឧត្តមប្រធាន គ.ជ.ប ដែលបានអនុញ្ញាតឱ្យនិស្សិតបានចុះមកសិក្សាស្វែងយល់ពីការបោះឆ្នោតនៅទីស្តីការ គ.ជ.ប។ លោកសាស្ត្រាចារ្យបានបន្តថា និស្សិតដែលចុះមកធ្វើកម្មសិក្សានាពេលនេះ កំពុងសិក្សាមុខវិជ្ជាផ្នែក វិទ្យាសាស្ត្រនយោបាយ ដែលមានការសិក្សាពាក់ព័ន្ធនឹងការបោះឆ្នោតដែរ ហើយគោលបំណងនៃ ជំនួបគឺដើម្បីស្វែងយល់បន្ថែមអំពីការបោះឆ្នោតនៅកម្ពុជា។ ម្យ៉ាងទៀតនិស្សិតចង់ស្តាប់ប្រសាសន៍ ឯកឧត្តម ហង្ស ពុទ្ធា ឱ្យបានច្រើន ព្រមទាំងមានសំណួរមួយចំនួនផងដែរ។
ឯកឧត្តម ហង្ស ពុទ្ធា បានចែករំលែកបទពិសោធន៍ការងាររបស់ឯកឧត្តមដែលធ្លាប់ធ្វើការនៅអង្គការមិនមែនរដ្ឋាភិបាលចំនួន ១៨ឆ្នាំ និងជាសមាជិក គ.ជ.ប មកទល់បច្ចុប្បន្នចំនួន ៩ឆ្នាំ។ ឯកឧត្តមបានបន្តថា ឯកឧត្តមធ្លាប់ធ្វើជាអ្នកសង្កេតការណ៍បោះឆ្នោតអន្តរជាតិនៅតាមបណ្តាប្រទេស ជាច្រើនឃើញថា នៅប្រទេសខ្លះតាមសាលារៀនបឋមសិក្សាមានមុខវិជ្ជាបង្រៀន និងអនុវត្តការបោះឆ្នោតតាំងពីនៅវ័យកុមារ និងមានវិទ្យាស្ថានបង្រៀនអំពីការបោះឆ្នោតដល់ប្រជាពលរដ្ឋ។ ចំណែកនៅកម្ពុជា ពុំមានសាកលវិទ្យាល័យជំនាញខាងបោះឆ្នោតទេ។ ឯកឧត្តមបានបន្តថា ការ បោះឆ្នោតនៅកម្ពុជា គឺជាការប្រកួតប្រជែងគ្នាដោយសន្តិវិធី យកមតិភាគច្រើនដើម្បីមានតួនាទីដឹកនាំ ប្រទេស។ នៅឆ្នាំ១៩៩៣ ប្រទេសកម្ពុជា មានការបោះឆ្នោតជ្រើសរើសសភាធម្មនុញ្ញ ដែលមាន
សមាជិកចំនួន ១២០រូប។ សមាជិកសភាធម្មនុញ្ញទាំង ១២០រូបនោះ បានតាក់តែងរដ្ឋធម្មនុញ្ញ និងអនុម័តរដ្ឋធម្មនុញ្ញ។ បន្ទាប់មកសមាជិកសភាធម្មនុញ្ញបានក្លាយទៅជាសមាជិករដ្ឋសភា។ ចាប់តាំងពីពេលនោះមក ប្រទេសកម្ពុជាបានរៀបចំការបោះឆ្នោតយ៉ាងទៀងទាត់ ៥ឆ្នាំម្តងៗ សម្រាប់ ការបោះឆ្នោតជ្រើសតាំងតំណាងរាស្ត្រ ការបោះឆ្នោតជ្រើសរើសក្រុមប្រឹក្សាឃុំ សង្កាត់ និងការ បោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ហើយសម្រាប់ការបោះឆ្នោតជ្រើសតាំងសមាជិកព្រឹទ្ធសភា ៦ឆ្នាំម្តង។
បន្ទាប់ពីបានស្តាប់នូវការចែករំលែកបទពិសោធន៍ការងារ និងការបោះឆ្នោតនៅកម្ពុជារួចមក ក្រុមនិស្សិតដែលចុះកម្មសិក្សាបានដាក់សំណួរជាច្រើនដល់ ឯកឧត្តម ហង្ស ពុទ្ធា ដែលសំណួរទាំងនោះមានដូចជា អព្យាក្រឹត្យភាពរបស់ គ.ជ.ប ប្រព័ន្ធបោះឆ្នោតនៅកម្ពុជា និងនៅបណ្តាប្រទេស ផ្សេងៗទៀត ការចំណាយរបស់គណបក្សនយោបាយលើការឃោសនាបោះឆ្នោត ថវិកាគណបក្សនយោបាយ បញ្ហាប្រឈមរបស់ គ.ជ.ប ដំណើរការរាប់សន្លឹកឆ្នោត និងតម្លាភាពនៃការបោះឆ្នោត។ល។
ឆ្លើយទៅនឹងសំណួរខាងលើដល់និសិ្សតទាំងនោះ ឯកឧត្តម ហង្ស ពុទ្ធា បានលើកឡើងអំពីខ្លឹមសារក្នុងរដ្ឋធម្មនុញ្ញ ដែលមានចែងអំពីស្ថាប័នរៀបចំការបោះឆ្នោត ច្បាប់ស្តីពីការរៀបចំ និង ការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត ច្បាប់ស្តីពីការបោះឆ្នោត បទបញ្ជា និងនីតិវិធីសម្រាប់ការបោះឆ្នោត ព្រមទាំងច្បាប់ស្តីពីគណបក្សនយោបាយជាដើម។
ក្រោយពីបានស្តាប់ការបកស្រាយនូវចម្ងល់របស់ខ្លួនរួចហើយ និស្សិតទាំងអស់បានថ្លែងអំណរគុណដល់ ឯកឧត្តម ហង្ស ពុទ្ធា ដែលបានចំណាយពេលវេលាទទួលជួបពួកគាត់ ដើម្បី បញ្រ្ជាបការយល់ដឹងអំពីការបោះឆ្នោតឱ្យកាន់តែច្បាស់ថែមទៀត។ ទន្ទឹមនឹងនេះ ឯកឧត្តម ហង្ស ពុទ្ធា ក៏បានផ្តល់ឱកាសដល់និស្សិតទាំងអស់អាចសាកសួរបានគ្រប់ពេលតាមរយៈទូរសព្ទដៃ ឬ តាមអនឡាញ(Online)។
ការទទួលជួបនិស្សិតទាំង ១១រូប បានប្រព្រឹត្តទៅអស់រយៈពេល ២ម៉ោង ដោយភាពស្និទ្ធស្នាល៕
