សេចក្តីប្រកាសព័ត៌មានរបស់ក្រុមប្រតិកម្មព័ត៌មានលេខ ០០១ គ.ជ.ប៖ គ.ជ.ប សូមច្រានចោលទាំងស្រុង និងសូមថ្កោលទោសយ៉ាងដាច់អហង្ការចំពោះម្ចាស់គណនីអនាមិក “លោកចោរ ស្របច្បាប់”

មានជនខិលខូចបានបង្កើតគណនី Facebook អនាមិកឈ្មោះ “លោកចោរ ស្របច្បាប់” ហើយបានផ្សព្វផ្សាយលើបណ្តាញសង្គមតាំងពីថ្ងៃទី៣ ខែកុម្ភៈ ឆ្នាំ២០២៥ និងបានកំពុងបន្តចែកចាយដោយគណនីនោះលួចដាក់រូបថត ឯកឧត្តម ប្រាជ្ញ ចន្ទ ប្រធានស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) ដែលជាទង្វើអសីលធម៌ និងមិនអាចទទួលយកបាន ក្នុងចេតនាទុច្ចរិត មាក់ងាយ ស្ថាប័នជាតិ និងចេតនាបំផ្លាញលទ្ធិប្រជាធិបតេយ្យនៅកម្ពុជា គ.ជ.ប សូមច្រានចោលទាំងស្រុង និងសូមថ្កោលទោស យ៉ាងដាច់អហង្ការ។

សូមបញ្ជាក់ជូនថាគណនី Facebook ផ្លូវការ និងតែមួយគត់ហើយកំពុងដំណើរការសព្វថ្ងៃ របស់ឯកឧត្តមប្រធានស្ថាប័នគណៈកម្មាធិការជាតិរៀបចំការបោះឆ្នោតមានឈ្មោះថា “ឯកឧត្តម  ប្រាជ្ញ ចន្ទ”។ 

ទាក់ទងនឹងទង្វើខុសច្បាប់បែបនេះ គ.ជ.ប បាននិងកំពុងសហការជាមួយស្ថាប័នពាក់ព័ន្ធ ក្នុងការស្វែងរកជនអគតិបំពុលសង្គម ដែលធ្វើឱ្យប៉ះពាល់ដល់កេរ្តិ៍ឈ្មោះ និងសេចក្តីថ្លៃថ្នូររបស់   គណៈកម្មាធិការជាតិរៀបចំការបោះឆ្នោត ដើម្បីយកមកផ្តន្ទាទោសតាមច្បាប់។

គ.ជ.ប សូមអំពាវនាវជាឱឡារិកដល់សាធារណជន សូមបញ្ឈប់ជាបន្ទាន់នូវការចែកចាយគណនីក្លែងក្លាយខាងលើនេះ និងសូមធ្វើការផ្សព្វផ្សាយព័ត៌មានប្រកបដោយវិជ្ជាជីវៈ និងការទទួលខុសត្រូវ ចៀសវាងការបំភ្លៃ ការបំផ្លើស ការបរិហារកេរ្តិ៍ ប្រាសចាកពីការពិត។

គ.ជ.ប បច្ចុប្បន្នមានសមាជិក ៩រូប ដឹកនាំដោយឯកឧត្តម ប្រាជ្ញ ចន្ទ ដែលត្រូវបានរដ្ឋសភា បោះឆ្នោតផ្តល់សេចក្តីទុកចិត្ត គាំទ្រ ជាឯកច្ឆន្ទ កាលពីថ្ងៃទី១៣ ខែធ្នូ ឆ្នាំ២០២៣ ស្របតាមមាត្រា ១៥១ថ្មី (ពីរ) នៃរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា៕